VOTO Diversitetin - LUFTO Homofobinë!

Ambasada PINK i kërkon forcave politike në Shqipëri të përfshijnë tematikën LGBT në programet e tyre elektorale dhe të luftojnë homofobinë!

Tiranë, 1 Maj 2013 - Data 17 Maj është Dita Ndërkombëtare Kundër Homofobisë (IDAHO), një ditë që feston vendimin e Organizatës Botërore të Shëndetësisë të vitit 1990 për heqjen e homoseksualitetit nga Klasifikimi Ndërkombëtar i Patologjive. Prej 5 vjetësh, organizatat LGBT dhe aktivistët për të drejtat e njeriut, avokojnë për të rritur ndërgjegjësimin e opinionit publik mbi pasojat negative të homofobisë, bifobisë dhe transfobinë.

Si çdo vit, Ambasada PINK / LGBT Pro Shqipëri udhëheq përpjekjet e komunitetit LGBT, shoqërisë civile dhe aktivistëve që luftojnë për respektin e të drejtave të njeriut në Shqipëri, për të vendosur theksin në problemet me respektimin e të drejtave të personave LGBT dhe ngjarjet negative të homofobisë dhe transfobisë.

Në këtë 17 Maj 2013, duke pasur parasysh se jemi në një vit zgjedhor dhe se angazhimi politik për avancimin e të drejtave LGBT është shumë i rëndësishëm, Ambasada PINK lançon Fushatën “VOTO Diversitetin – LUFTO Homofobinë”.

Imazhi i fushatës, paraqet spektrin e gjerë dhe ngjyrat reale të partive politike në Shqipëri, duke synuar që t’i kujtojë partive politike se diversiteti i shoqërisë pasqyrohet edhe në diversitetin e partive politike dhe ky diversitet përfshin edhe respektin dhe dedikimin që ato duhet të kenë për votuesit e tyre nga komuniteti LGBT në Shqipëri. Ai gjithashtu i kujton partive politike të luftojnë homofobinë brenda rradhëve të tyre duke rritur ndërgjegjësimin dhe mirëkuptimin e anëtarëve mbi këtë çështje.

Ambasada PINK mendon se përfshirja e çështjeve të respektimit të të drejtave të personave LGBT në axhendën e partive politike, duhet të jetë një proçes i natyrshëm në kuadër të luftës për avancimin e të drejtave të njeriut në vend dhe mbrojtjen nga dhuna dhe diskriminimi të të gjithë anëtarëve të shoqërisë. Ky proçes duhet të konsiderohet i natyrshëm edhe për faktin se pluralizmi dhe diversiteti që spektri politik shqiptar synon të promovojë në vend është një motiv i qartë për integrimin e të gjitha grupeve shoqërore që vuajnë paragjykimin dhe përjashtimin.

Ambasada PINK / LGBT Pro Shqipëri është një organizatë jo-partiake dhe jo-politike. Ajo punon për avancimin e të drejtave të njeriut të personave LGBT. Objektivi  i saj është të ndryshojë sjelljen dhe opinionin e shoqërisë shqiptare ndaj këtij komuniteti në mënyë që ai të gëzojë të gjitha liritë dhe të drejtat e tij ashtu si çdo qytetar tjetër i këtij vendi.